सडकमा सुकाइएको गहुँको बालामा चिप्लिएर नव दुलहादुलही

भक्तपुर, ४ जेठ

नव दुलहादुलही मन्दिर गएर फर्कने क्रममा सोमबार निकोसेराको मूल सडकमा गहुँमा चिप्लिएर मोटरसाइकल लड्दा घाइते भएका छन्। सडकमा सुकाइएको गहुँको बालामा चिप्लिएर मोटरसाइकल पल्टिएपछि काभ्रे घर भई भक्तपुर बस्ने रोहित थापा र उनकी श्रीमती अम्बिका घाइते भएका थिए। यो त एउटा नमुनामात्रै हो, भक्तपुरका विभिन्न कालोपत्र सडकमा यस्तो दुर्घटना दैनिक हुने गरेको छ। सवारीसाधन गुड्ने सडकमै गहुँ सुकाउने र बत्ताउने गर्नाले मोटरसाइकल दुर्घटना बढेको महानगरीय ट्राफिक परिसर भक्तपुरले जनाएको छ।
यहाँका कृषकले सडकमा गहुँ र बाला सुकाएर यातायातका साधनको टायरले किचिदिने भएपछि चुटिरहने झन्झट नहुने भएकाले सडकभरि गहुँ राख्ने प्रवृत्ति बढेको हो। थिमी, निकोरेसा, व्यासी, कमलविनायक, जगाती, च्यामासिंहलगायत सडकमा गहुँ राख्ने र बत्ताउने गरिएको छ। गहुँ बत्ताउँदा गहुँका टुक्रा सडकभरि हुने गरेको र दुर्घटना हुँदासमेत ट्राफिक प्रहरी प्रशासनले यसलाई रोक्न चासो नदिएको मोटरसाइकल चालकको गुनासो छ।
महानगरीय प्रहरी परिसर, जिल्ला प्रशासन कार्यालय र जिल्ला विकास समिति छिर्ने नाकैमा रहेको व्यासी सडकमा गहुँ सुकाउँदा र बत्ताउँदा दुर्घटना भएको देख्दा पनि प्रहरी प्रशासनले रोक्न नखोजेको स्थानीयवासीले आरोप लगाए। ट्राफिक प्रहरी परिसर र जिल्ला प्रशासन कार्यालय भने यस्तो कार्य रोक्ने काम आफूहरुको नभएको भन्दै पन्छिएका छन्।

दैनिकी डट कम बाट

Leave a Reply